MIZO CHRISTOLOGY
Zadingluaia Chinzah

Tuna kan course zir mekah hian elective paper (history of Christianity in Africa) tih ka la a. He course hi danglam tak leh ngaihnawm tak a niin ka hria a. Colonialism in a tihbuai ram a ni a, tin missionary pawh an tam a, kohhran chi hrang hrang an awm thu pawh kan hre theuh awm e. An kohhran hi chi hnihin a then theih awm e: mahni-a indin leh missionary ho dinsak kohhrante an ni. Missionary kohhran din a tel ve lo te chanchin hian beng a verh hle mai a. An awm hranna chhan ber nia an sawi chu kristianna an hriatthiam dan leh Pathian thu anmahni nun mil a kalpui an duh vang a ni a, an Pathian thu lak dan hi a fuh riauvin ka hria. An theology in a tum ber nia lang chu Pathian thu hi engtin nge an nunah an lakluh ang a, engtin nge an nunpui ang tih hi a ni deuh ber mai. He theology, tunlai a mizo theologian tamtak in contextual theology an tih chu a ni. Hei hian kan ram kohhran kalphung min ngaihtuah tir nasa hle. Mizo te hian missionary dinsak kohhran leh missionary pek Pathian thu hi mi kan sawi anga kan zawm dawn? tih leh kan khawsak danah chanchintha hi kan senglut taktak em? tih zawhna min pe a. Chu zawhna chu chhan tumin heti hian ka han thai ve nawk nawk a.
Kan sawi tawh angin, kan khawsak zia mila chanchintha kan hriatthiam hi a pawimawhna ber chu kan khawsakzia a nih tawh chuan kan nunnah a bet tlat dawn tihna a ni. Chutiang a nih chuan chanchintha chu keimahnia awm leh keimahni atanga chhuak a ni dawn a, chu chuan he chanchintha kan vawn dan leh nunpui dan kawngah hriatthiamna tamtak min neihtir thei dawn a ni. Chanchintha hi kan nunah hian a ngheh phah sawt ka ring.
BD kan zir laiin contextual Christology hi a lar khawp mai a. Chutah chuan Krista kan hriatthiam dan leh Krista chu kan hnamah lo lut dawn se, tu chanpual (role) ber hi nge a thawh a? tih hi a ni ber a. Mizo theologian ho pawhin an ngaihtuahna an seng tam hlein ka hria. Kan zirna boruak atangin a ni ‘Pasaltha Christology’[1] tih thupui ka hmelhriat. Tha leh fuh ka ti khawp mai a. Fakselna tlem han nei lawk ila. Pasaltha awmzia kan hria. Pasaltha nena inkaihhnawih pawimawh tak chu tlawmna nun te, mahni hmasial lohte, a tawi zawngin tlawmngai hi a ni a. He chanpualah hian Krista hi a ‘qualify’ chiang kher mai a. A dik viau pawhin ka hria. Chhanchhuaktu/chhandamtu a nihna Mizo hriatthiam dan turin, fiah leh fait akin a rawn sawi a, Krista pasaltha anga en chuan Krista mizia tur pawh tamtak mizo takin min hriatthiam tir bawk a. A ziaktute hi an fakawm ka ti hle. Mahse han tit eh ang. Mizote’n Pasaltha ka hriatthiam dan lehlamah chuan sa kap thei, mi lu la thei (indo thiam) a nihna a rawn lang ta tlat mai a. Hetah hian Krista hmel a lang har tlat. Hmangaihna min zirtirtu leh tarlangtu chu sa kap mi ni tur leh hmelma lu la tu chuan belfuh hi har ka ti thin. Pasaltha Christology duangtu te hian hei hi an hmu tho a, mahse mahni mi leh sa venghimtu leh ei in petu angin an sawi ta daih a, a tumna leh thiltih a fakawm hle. Mahse, thisen chhuah thin ni tur chuan Krista chu hmehbel a har duh khawp mai. A nunzia kan thlir phei chuan, pasaltha chu ni rih lo se. Mahse, Pasaltha Christology tichhuaktu leh hemi lama ziaktute hi ka ngaisang riau. Missionaryte min pek loh chanchintha a ni tlat.
Post-colonial theology hi ka ngaisang a, sap ho min awp lai leh missionary te’n kan khawsak zia a, an duh zawng tha min tihsak a, an duhloh chu sual an ti ngawt kha ka lungnawi lova. Chuvangin post-colonial takin Mizo Christology ka tarlang ve duh tlat a ni. Social leh politics lam hawiin pasaltha Christology kan tarlang tawh a, tunah chu sakhuana lawm atangin bul tan dawn teh ang. Kei atan chuan Mizo Christology intanna ber nia ka ngaih chu sadawt leh bawlpu Christology hi a ni tlat. Sadawt leh bawlpu awmzia tlemin han tarlang ila.
Hmasang Mizo nunah chuan sakhaw thil tinrenga puipa ber chu "Sadawt" a ni a. Miin sakhua a biak dawn a piangin Sadawt hi a ruai thin a, Puithiam hna a thawk thin a ni. Lalin a hranin Sadawt a nei a, Sadawt zingah chuan a lian ber leh puipa bera ngaih a ni. Heihi sadawt hna leh a awmzia kan hriattheih dan tawite a ni. Tin, Bawlpu chu natna tidamtu a ni. Damlo leh natna nei a piangin an ko va, anin damlo mar chu a dek a, a chawh apiang chuan inthawi tur a ni. Bawlpu chuan thiam hla an nei a, a natna thawi tur a zirin thiam hla hrang hrang an hmang thin.[2]
An hna chanpual hi kan en chian chuan Krista, khawvel-a a lenlaia a hna thawh pawimawh zinga mi a ni tlat. Krista chuan Pathian hmaah kan ai min awh sak a, kan palai a ni. Kan thiamlohna zawng zawng Pa hnenah a sawifel a, Pa lung tihawi a, Pa nena hmunkhata hlim tak leh muang taka kan chenho theihnan. Hmanlaia sadawt kan tih thin khan he chanpual hi a ni law’m ni an thawh ber thin? Chutiang bawkin kan bawlpu neih thin te kha missionary leh kohhran mithmuhah chuan an dinhmun a tha ber lo hle mai. Missionaryte’n an duhdan min hnuchhiah kha a ni miau a, kan la vawng nung reng chu a ni a. Mahse, Krista thupui pathum ‘tihdam, thu hril leh zirtir’ah khan tihdam rawngbawlna kha a pawimawh hle si a. Kan bawlpu te hian engvangin nge tun dinhmun hi an chan le? Hmanlaia kan pi leh pute’n an damlohna atanga damna an neih theihnan a hman bawlpu hi Krista min hriatfiahtirtu an ni thei a ni law’m ni? Bawlpu chuan damna a thupui ber a, Krista rawngbawlna kha damna a ni tlat. Sadawt leh bawlpu Christology hi missionary te khan lo hmang ta se, chanchintha hi tun ai mahin kan nunpui lehzual tur. Mahse, hman ahnekin sualah min pawm luihtir a, kum za hnuah chuan sual an ni ta reng mai. Sap kristianna leh an chanchintha kalpui dan hi kan hrethiam tak tak thei lo. An nunphung kan tawnpui thiam lova, an nundan zir fe hnuah chanchintha awmzia zir a ngai leh a. Chutiang chu kan tum a, vawiin ka thleng ta chu a ni ta reng mai. Hmanlai Mizo sakhuana nunah chuan inthurualna a lian hle a, tunlai kan kohhran nunah chuan inlakhranna leh kohhran hrang nihna a lian ta hle.
Missionary-te zirtirna kan pawm a, chanchintha kan khawsak leh inrelbawlnaah senglut lovin, keimahni zawk hi kan missionary-te zirtirnaah kan in vawm lut a, kohhran a thang a, kohhran tamtak kan awm phah ta a ni. Kan pi leh pu te value system kan kalsan a, he system ah chanchintha hi lo la lut ta ila, kan va nghet zawk dawn em! Krista hi kan sadawt, kan puithiam, kan palai ah lo hmang tai la, kan bawlpuah lo awm ta se, kan nun a va khawih nasa dawn tehlul em. Sap ho chuan chanchintha an dawn khan, an khawsak ziaah an senglut a, tunah chuan kristianna hi Asia khawmualpui atangin a lo piangchhuak tiin va hrilh ila, an awih tawh lo. Sap sakhuana ve hrim hrimah an ngai tawh. A chhan chu an nun khawihtu pawimawh ah khan Krista hmel a la ta. Heihi a ni tuna Mizo Christology in a tum ber chu.

[1] Lalpekhlua, L.H., Contextual Christology: A Tribal Perspective (Delhi:ISPCK, 2007) hi a PhD thesis University of Auckland, New Zealand, 2005-a submit a ni. Tin, Lalhmachhuana, Pasaltha Christology’- he article hi internet atanga ka hriat a nih vangin a website ka tarlang mai ange. 25th January 2007-a a ziah ni nghe nghe-in ka hria. http://mizoworldconcern.com/Portals/801/articles/Pasaltha%20Christology%20Mizo.pdf
[2] Thangpuii Pa, Hmanlai Zonun. Http://www.chhaktiangzirlaite.info/viewpost.php?post_id=45

Walk the Line